(( الفروقات - الأستفسارات والأسئلة ))
في البدايه سا أضع لكم صور ملابسي السابقه والحاليه ,, لتروا الفرق بينها ,, وبعد الصور سوف أجيب على الأسئله والأستفسارات التي وصلتني .
الأرقام التي باللون الأصفر في الصورة السفلى هي أرقام مقاسات البناطيل
للمعلوميه : جميع البناطيل التي تظهر في الصورة كنت أرتديها في حينها بدون (( حزام )) ,, حتى البنطال الذي مقاسه 50 لم أرتدي حزام عندما كنت أرتديه لأنه كان (( ضيق )) .
للمعلومية : الجاكيت ( البني ) لم أكن أستطيع أغلاقه سابقاُ ,, وتوجد صورة وأنا أرتديه في موضوعي الأخير وأنا أرتديه .
عند رؤيتي لتلك الصور لا أستطيع سوى القول (( الحمد والشكر لله ))
الأستفسارات والأسئلة :
** هل عانيت من نقص فيتامينات؟
لا ,, الحمدلله ,, على الرغم أنني لست منتظم في تناول الفيتامينات
**او نقص في ال ب12؟
لا ,, والحمدلله ,, على الرغم أيضاُ أنني لست منتظم في تناول اقراص الحديد
**او احد الامراض بعد الجراحه؟
لا ,, والحمدلله ,, ولكن تعرضت في أحد الأيام لهبوط في سكر الدم بسبب أستعجالي في تناول المأكولات ,, وأصابني هبوط سكر الدم في أول أيام شهر رمضان المبارك ,, بسبب تناولي للأكل با استعجال وبدون تأني .
** هل تنصحنا بها ؟
السؤال هذا يتطلب وقتاُ للأجابه عليه ,, لذلك سوف أجيب عليه في نهاية الأسئلة .
** هل عآنيت من الترهل؟
توجد ترهلات خفيفه ,, وأنا والحمدلله مارست الرياضه بعد العمليه بثلاثة أشهر ولم أنقطع عنها الا قرابة شهرين فقط ,, وكان لممارستي الرياضه دور في شد الجسم ,, وسوف أعمل في الأسابيع المقبله على شد الجسم .
** طيب كيف الثقه الحين ؟ وكم مره رحت لمجمع الراشد بعد العمليه ؟؟
الحمدلله الثقه الحين في أعلى درجاتها ,, وبالنسبة للمجمعات أنا لا أذهب الا لمجمع الظهران فقط .
والله دنيا وصرنا نروح مجمعات
** 2010 < اكيد كانت سنـه مميزه وتحول خطير بحياتك
من أجمل سنوات العمر أكييييييييد
** ابغى انحف 10 كيلو بس وابغى بسرعه ؟!
أول شيء ما أنصحك بالأستعجال ,, لأن أكبر غلطه يرتكبها اللي يسوون ريجيم ورياضه أنهم يبون ينزلون كيلو كل يوم ,, وهذا أمر مستحيل ,, لازم تصبرين وما تستعجلين .
وبالنسبة للطريقه أنا أنصحك أنك تتركين جميع الأكلات اللي فيها دهون ,, والحلويات ,, وتركزين على المشويات والخضروات والفواكه فقط .
** - واحد من اخواني الحين بسادس ابتدائي خايفه عليه مره خصوصا انوه وزنه في الخمسين وش الحل ؟
هذا أخطر سن للسمنه وهو نهاية المرحلة الأبتدائيه ,, أنصحكم أنكم تشدون عليه في مسألة نوعية التغذية + الحركه
يعني خلوه يمشي بشكل يومي ,, وما فيها شي لو أخذه أبوك أو أحد أخوانك أو أنتي أو أمك ورحتوا تخلونه يمشي 40 دقيقه كل يوم .
وأهم شي خلوه يقلل من المشروبات الغازيه أو يقطعها أذا أمكن .
وكذلك الأكلات اللي فيها دهون مثل البطاطس والكبسه والشاورما والهامبرغر .... الخ
نصيحه نصيحه حاولوا قد ما تقدرون أن وزنه ما يزيد عن 40 ,, وخليه يشوف صور لأشخاص وزنهم كبير ,, وقولوا له ترى أذا ما أنتبهت لنفسك راح تصير مثلهم .
أسلوب الترهيب والتخويف ينفع كثيير مع الأطفال .
** وش العمليه ؟ على فكره !
تحوير- تحويل مجرئ المعدة
** ردة فعل الناس يوم يشوفوك ؟ خصوصا اصدقائك ؟
أكيد مو مصدقين اللي يشوفونه .
بعضهم يفرح وينبسط ,, وبعضهم يتضايق وينتقد شكلي الجديد ويقول (( شكلك أول كان أحلى ))
وأنا الى الآن مستغرب من ردة فعلهم
** وش الفرق بين قص المعدة ومحورة المعدة؟
والله مدري كيف أشرح لك
ولكن حاولت أجيب لك معلومات عل وعسى تفيدك :
ماهي عملية تحويل مجرى المعدة ؟
تحويل مجرى المعدة هي عملية يتم عن طريقها اختزال حجم المعدة.تربط المعدة الصغيرة بالمعي الدقيق متجاوزين القسم السفلي من المعدة والقسم العلوي من المعي الدقيق.
ماهي عملية قص المعدة ؟
قص المعدة هي عملية لإزالة جزء أوجميع أجزاء المعدة
** كم تكلف العمليه؟
تختلف من مستشفى لمستشفى
ومن جراح لجراح
اللي أعرفه أن تكلتفها تتراوح بين 40 الف و 65 الف
إقتباس »وش جاب لجاب
تشبه راشد الفارس الحين
لا أشبهه ولا يشبهني
يمكن بالجسم أتفق معاك
غير كذا كل شي يختلف
** لو الحرمه سوت العمليه ونحفت .. وحملت وولدت ترجع تسمن والا كيف ؟؟
لا ما أتوقع
لأن المعده صغيره وبمجرد تأكل أي شي راح تشبع
الا أذا
الا أذا توسعت معدتها ورجعت مثل أول
أكييد راح ترجع تسمن
** عمرك حسيت بالندم أنك سويت العمليه ؟؟
لا ,, والحمدلله ,, وأذا حسيت بالندم راح أحس فيه لأني ما سويت العمليه قبل كم سنه عشان أعيش حياتي بشكل أفضل من السابق
الحمدلله على كل حال
وكل شيء مكتوب ومقدر
** وش الأشياء اللي أختلفت على عقيل قبل وبعد العمليه ؟؟
هذا جوابي عن مثل هذا السؤال قبل فترة :
1- قلة النووم والأكل
2- المشي لساعات والوقوف لساعات
3- الأكل بتأني
3- عدم خلط الأكل والشرب بنفس الوقت أنما الشرب يأتي بعد الأكل بدقائق
4- قمصاني اللي مقاسها أول xxxxl صارت الحين m وأذا لبست L يصير مرره وسيع علي
5- الثقه زادت والطموحات زادت
6- احط رجل على رجل وأتربع لفترات طويله
7- شكلي تغير 180 درجه للأفضل
8- صارت نفسيتي لنوعيات الأكل غير السابق ,, حالياُ ما أحب آكل الا الأكل الصحي مثل المشويات والسلطات والشوربات بأنوعها
وصرت أكره الأكلات اللي تحتوي على نسبة دهون عاليه وتركت الكبسه والغازيات والشاورما والهمبرغر
العادة السيئه اللي أخذتها بعد العمليه هي حب الحلويات ولكنها ما تزيد في وزني ولا تشكل أي تأثير عليه حالياُ
في نهاية الأسئلة راح أجيب عن السؤال اللي فضلت الأجابه عليه في النهاية :
** هل تنصحنا بها ؟
في مثل هذي العمليات الخطيرة أنا ما أحب أنصح أحد ,, لأني قابلت شخص توفت زوجته بسبب هذي العمليه ,, لأنها أجرت العمليه تحت يد دكتور عربي أول مره يجري العمليه هذي وقطع شيء بالغلط أثناء العمليه وما قدر يتفادى الموضوع ,, حاول وحاول وفي النهاية أنتقلت الى رحمة الله .
أذا بغيت أنصح أنصح بشيئ واحد فقط :
أنصح أن يتم أجراءها عند الدكتور أحمد القرزعي ,, أو عند الدكتور سلطان التمياط
لأن هالدكتورين عملوا مئات العمليات وعندهم خبره كبيره في هذا المجال .
أنا كان شرطي الوحيد قبل العمليه هو أن الدكتور أحمد القرزعي هو من يجري لي العمليه ,, غير كذا ما أهتميت لأي شيء ثاني .
في النهاية أحب أشكر جميع الأخوات والأخوان اللي تفاعلوا مع السلسلة ,, لعل وعسى يكفيهم الشكر .
